من اناعيد ميلاد جى جى
استيقظت من نومى كعادتى ، منهك القوى اترنح يمينا وشمالا ، وتحسست طريقى الى المطبخ لاجهز كوبا من الكابتشينو او النسكافيه ......واتجهت الى الجراج مسرعا.....
أنا : صباح الخير ياحياتى
جى جى : صباح الخير.....مالك عامل كده ليه؟
أنا : تعبان ومش قادر....ينفع ماروحش الشغل النهارده؟؟
جى جى : بطل دلع ...وصحصح كده
أنا : مالك بتبصيلى كده ليه
جى جى : مببصش.....وهابص إزاى يعنى
أنا : اه ....بتديقيلى كشافاتك كده ، وبتبصيلى بالفوج من تحت لتحت...زى مايكون بتستحلفيلى
جى جى : مش ناسى حاجة؟؟؟؟؟
أنا : اخخخخخخ ....بنت حلال والله ، فعلا نسيت المحفظة فى البيت
جى جى : وايه كمان؟
أنا : أيوة أيوة.........نسيت كمان اللاب توب......انا مش عارف دماغى فين
جى جى : طبعا ياسيدى....اللى واخد دماغك....مفيش حاجى تانى؟
وقلت فى نفسى ياترى ياواد ابو المصاطيف هى بتسأل ليه......اكيد أنا ناسى حاجة مهمة......أكونش نسيت أغيرلها الزيت.....
لالا......غيرته......طب تكونش البوجيهات.....برده غيرتها.....امال ايه بس ...اكيد ..
وأثناء محاولاتى المستميتة لإنقاذ مايمكن انقاذه وتذكر ماقد نسيته......صاحت جى جى بصوت عالى
خلاص خلاص متحاولش....ماهو انا لو مهمة فحياتك كنت افتكرتنى....
وهنا ....وفى هذه اللحظة.....أحسست انى قد مررت بتلك التجربة من قبل.....ولكن ليس مع جى جى...وانما مع زوجتى....حين نسيت عيد زواجنا الاول.....وقضيت بعدها شهرا من أجمل شهور حياتى فى مستشقى القصر العينى أعالج من الكسور والكدمات التى أعانى منها حتى الآن........
الآن .....قررت أن اتظاهر بأنى لم أنسى.....وخصوصا أنها قد أدارت الموتور.....وبدأ الار بى أم يعلو فوق الستة الاف
أنا : ههههههه.......
تلك كانت ضحكة ساذجة منى.....ممزوجة بالخوف من قضاء شهر أخر بالقصر العينى....أو الذهاب مباشرة الى مقابر الغفير دون المرور على القصر العينى....
انتى فاكرانى ناسى والا ايه..............بس انتى حرقتيلى المفاجأة.....كده برده.....مش تصبرى شوية
جى جى : عليا برده الكلام ده.....ده انت ولا فاكر حاجة...هوا أنا مش عارفاك
أنا : (بكل حزم وشدة) لالالا.....انتى فاكرة ايه......مش أنا اللى أنسى حاجة زى كده....ده أنا أنسى أسمى...ولا أنسى اليوم ده
وبينى وبينك....انا حتى الان لا أتذكر شيئا....فأانا ياصديقى العزيز....اتمتع بذاكرة خرافيه....بينها وبين التواريخ والمناسبات عداء متوارث منذ قديم الاجل.....
الآن أنا أعرف انه توجد مناسبة ما....ولكن ماهى؟؟؟؟؟؟....عيد ميلادها!!!!.....جائز......عيد ترخيصها؟؟؟؟.....يجوز......عيد تحرير السيارات.....ممكن........وما الحل للخروج من هذا المأزق....فأنا أقف أمامها.....وصوت موتورها المرعب يزأر ويملأ قلبى بالخوف....فربما قررت فجأة أن تتخلص منى للأبد لأنى نسيت هذه المناسبة الهامة
جى جى : ها.....ماتقول ياناصح
أنا : استنى بس ياحياتى...ماتحرقليش المفاجأة اللى انا برتبها من تلت شهور
جى جى : يااااااسلام.....خفيف أوى....بطل حركاتك دى بقى....مفقوسة
أنا : واضح ان مفيش فايدة......
وأخرجت الموبايل من جيبى ...
جى جى : انت هاتكلم مين؟
أنا : القصر العينى
جى جى :ليه؟
أنا : بشوف فى سراير فاضية ولا لأ...أصل المرة اللى فاتت استنيت كتير لغاية ماسرير فضى فى قسم فى العظام.....اصله كان زحمة أوى.....كان موسم........الفلانتين داى .....فقلت أحجز أحسن.
جى جى : هههههههه.....وليه كده بس......وانت تهون عليا برده أعمل فيك كده
أنا : (بكل فرح) ده العشم برده ياحياتى......
جى جى : متقلقش ياحبيبى.....أنت غالى عليا....ومهما نسيت ....عمرى ماوديك القصر العينى أبدا......أنا حجزتلك جناح فى دار الفؤاد..........ههههههههههه
اضافة تعليق