أصحى مش شايف مدغشش ..أبص على الموبايل أشوف الساعة....تسوللي نفسي المريضة إني أبص بصة على الفيس أشوف إيه اللى حصل فى المخروبة فى الكام ساعة وأنا نايم
يادوبك ...أفتح....وألاقي المتعوس ده مستنيني بشوية نوتيفيكاشنز حلوين –النهاردة عيد ميلاد إبراهيم ...محمد علّق على بوست سهام....حسنين عمل لايك لصورة حاطاها عطيات....إنجي بقت كلوز فريند لريهام
أنفض وأعمل نفسي مش واخد بالي ...يسكت هو بقى ...لأ
-النهاردة عيد ميلاد إبراهيم..مأخدتش بالك والا أيه .....قوله كل سنة وأنت طيب
* لا معلش مش عايز...
-ليه
* ماليش مزاج
-طب ماتبعتله كارت تهنئة
* ياسيدى مش عايز يخرب بيت زنك على الصبح
-ده ببلاش متخافش
* أه ياوااطي...هاتسكت والا أقفلك
-خلاص ياعم....أنا قلبى عليك عشان إبراهيم ميزعلش منك...صاحبك...حبيبك
* حبيبي مين ياعم أنت ...انا معرفوش أصلا...وبعدين قلتلك كتير خليك فحالك احسنلك....أخر مرة أنبهك
-ياساتر على رخامة أهلك....
شوية كده....ويادوبك أنزل كام بوست لتحت
-متشوف الاعلان ده...هايعجبك اوي
* متشكر ياسيدى ...معييش فلوس ومش هاشتري حاجة
-ده فى تخفيض إلحقه.....
* يابني إتقي شري على الصبح...انا ببقى غبي اول مابصحى...تجنبني وسيبني فحالى بقى
-خلاص ياعم...براحتك أنا خايف على جيبك إنت حر
* أه أنا حر ...غور بقى من وشي
ومفيش دقيقة ويادوبك لسة هاندمج وهاعيش مع كام بوست وألاقى الحيوان ده طلعلي
-بص كده الواد ده...انت احتمال تعرفه على فكره...إبعتله فريند ريكويست...واد محترم أوي
* لا معرفوش...ومش عايز أعرف ميتين اهله....وقلتلك سيبني فحالي بدل ماقفلك للأبد
-خلاص ياعم متزقش كده....انت خلقك ضيق أوي...إتفضل ياسيدي...خد راحتك
* ياساتر ...ده انت برنامج سقيل وإللى عملك رخم
اختفى الملعون دقيقتين ...قلت كويس..غار فداهية...ولسة بخلص بوست ونازل على اللى تحته يقوم ناطتلى
-انت على فكره كنت مسيف 23 بوست ومبصتش عليهم ولا مرة....ماتبص دلوقت
* يخرب بيت أبو اللى عملك يا أخي...مش عايز ابص عليهم...مش هاشوفهم ....مش فاضي أنا دلوقت...أقولك ....أدي ال23 بوست ياعم عشان ترتاح...ديليت...أهووو...ديلييييت....إرتحت دلوقت......ياللا بقى من هنا
-إنت غريب أوي...ده جزائي إللي بفكرك ...خلاص ياعم حقك عليا أنا غلطان
* أه غلطان ...إتحرق بقى من ادامي
-ماشي ياسيدى...هامشي واريحك مني....هامشي
* أه إمشي .......متشكر جدا....مشوفكش تاني بقى
-بس قبل مامشي عايز أقولك على حاجة مهمة جدا.....تصور إن فيه إفينت صحابك محمد وأسامة إنتريستد فيه وإحتمال يروحوه...ماتروح معاهم
* ياعم وانا مالي مايروحو ...الله يسهلهم...إتكل بقى ارمي بلاك على حدغيري...الفيس مليان
-معرفش إنت قافش مني ليه كده...عموما ماشي براحتك ......بس خللى بالك... إن إنجي بقت كلوز فريند لريهام .....يرضيك كده.....
ياعم وانا مااااال إللي جابوا اهلي.....كلوز ولا أوبن......وأه يرضيني أوي ....إرحم أهلي بقى
-خلاص متتعصبش كده....هامشي...هاغور.....بس ممكن أقولك حاجة قبل مامشي
* قول بقى وخلصني ده انت خنيق
-ابراهيم زعلان منك أوي
ياللا من هنا ياسافل يامنحط...عليك وعلى إبراهيم وعلى البيرث داي اب وعلى الفيس زفت ....ياساتر ده إنت برنامج فشيخ....أنا غلطان إني فتحتك أصلا....